تھائی لینڈ میں دیوتاؤں کو خوش کرنے کا دل دہلا دینے والا تہوار

یوں تو دنیا کے ممالک میں مذہبی تہواروں پر کچھ عجیب و غریب روایات لوگوں کی توجہ کا مرکز بن جاتی ہیں لیکن تھائی لینڈ میں ایک مذہبی تہوار میں یہ روایات کچھ خوفناک اور دل دہلا دینے والی ہیں جس میں شرکت کے لیے ہزاروں افراد جمع ہوجاتے ہیں۔

تھائی لینڈ کے شہر فوکٹ میں چینی سال کے نویں مہینے میں  منایا جانے والا تہوار  بظاہر تو انتہائی رنگا رنگ اوردلکش رقص سے لوگوں کو توجہ اپنی طرف کھینچ لیتا ہے تاہم اس میلے میں شرکت کرنے والوں میں سے کچھ ایسے کرتب دکھاتے ہیں جو دیکھنے والوں کو اپنے سحر میں جکڑ لیتے ہیں، یہاں کے لوگوں کی روایات کے مطابق اس میلے کا باقاعدہ آغاز 150 سال قبل ہوا تھا



جب لوگ چینی سال کے نویں مہینے کے پہلے نو دن تک اپنے 9 دیوتاؤں کی عبادت کرنا بھول گئے تھے، لوگوں کے مطابق وہ اس کوتاہی کا ازالہ خود کو تکلیف دے کرتے ہیں۔

مقامی روایات کے مطابق لوگ اس میلے کے 9 دن تک گوشت، شراب، جنسی تعلقات اور لڑائی جھگڑے سے دور رہتے ہیں اور کچھ  تو اس سے بڑھ کر سیکڑوں سوئیوں کو اپنے چہرے، زبان اور جسم میں  پرو دیتے ہیں جب کہ میلے میں شریک بعض افراد تلوار کو اپنے چہرے کی ایک طرف سے دوسری طرف نکالتے ہیں، یہ منظر دل دہلا دینے والا ہوتا ہے  تاہم ان افراد کو اس تکلیف میں سکون ملتا ہے اور لوگوں کا بھی کہنا ہے کہ بیشک یہ تکلیف دہ عمل ہے لیکن وہ ایسا کرنے میں سکون محسوس کرتے ہیں۔